賠率有路捉：快意有早飛到

猪拉多纳

　　第二場四班1200米，十匹參戰馬甩皮甩骨，唔少仲係未上過名，掛頭牌霍廐「快意」係其中一匹，但出奇佢噚日早飛熱到得8倍，而上季四仗最熱都有51 倍，更加突顯今戰早飛有幾勁。

　　睇番此駒上季最後一戰三班1200 米，只不敵「金堡龍華」、「海王子」及「開心自在」跑第四，輸三馬位，而佢哋統統係三班頭馬，顯示「快意」喺四班實夠爭。既然早飛勁，又換馬房愛將馬偉昌，信得過。

　　五班賽一向混亂，仲編埋三T頭關，唔爆有鬼。第四場五班1400米，最熱兩駒係柏寶嘅「極速寶寶」，以及韋達坐騎「雄獅寶貝」，非常合理；但位置大熱居然落喺「聚豪精英」身上，20倍W，位置卻只得18蚊。

　　不過此駒上季贏過四班賽，喺五班肯定有着數，既然有人一早落定大注注墊底P，小心真係飛到馬又到呀。

韋達騎師王熱透

　　騎師王方面，今季韋達次次熱唔透，但今期熱到得十幾蚊，似乎開盤手都暗示餐士好突出；而佢好拍檔蔡約翰有成手惡馬益佢，例如「有莊有閑」、「勁高手」、「好利利」同「明燈」，韋達要贏三、四W唔係難事，大熱門都捧得過。

周仲