吳定強精靈連勝四日

魑魅魍魉

一直以嚟，吳定強處理啲質新馬都係慢熱少少，唔係好多馬喺強哥訓練下可以一出即有表現，如果做到呢個高難度動作，實力肯定有番咁上下。
       
精靈勇駿走中檔不利場地仍輕鬆取勝，質素甚高。

好似尋日跑第二場嘅吳廐馬「精靈勇駿」，上鋪初出跑田草千二就攞第三名，今次縮落嚟跑一千米直路，換番復出嘅賴維銘即刻補中，認真犀利，仲要幫埋強哥連續四次賽事有馬贏，難怪佢開心到見牙唔見眼啦。強哥就話呢隻「精靈勇駿」嘅進度畀佢想像中嚟得快，今次都冇諗過贏得咁輕鬆，肯定係一隻好馬。至於今季仲會唔會再跑，就要睇番隻馬嘅進度同馬主商量先至有決定。