沙田寶加15分上岸

魑魅魍魉

昨日頭場舉行前馬會喺沙圈宣傳「最受歡迎馬匹及騎師選舉」，小將楊明綸現時喺騎師榜排第十，得以掹車邊成為候選騎師之列，不過初生之犢不畏虎，頭場即憑「沙田寶」爆出卅四倍大冷，以行動證明自己係有實力之人。
       
沙田寶一放到底打開勝利之門。

馬會評磅及賽事策劃部主管紀禮澤先生賽後透露，「沙田寶」將會加15分而增至25分，換句話講呢隻五班馬夠分上岸，逃過被淘汰嘅厄運。
       
再贏唔出奇

至於苗禮德幫到呢匹賽前只得十分嘅馬打開勝利之門，就梗係開心。佢話自己一直覺得「沙田寶」唔係咁差，屬於一匹四班馬，奈何之前操練上出咗些少問題，搞到隻馬唔長肉兼冇乜狀態，直到最近情況有所改善，加上跑番比較適合嘅千四，得以藉輕磅之利一放而返，如果情況繼續好轉，話唔定再有頭馬見面都唔奇。