馮諾嘉手記：火龍駒 縮程再贏

魑魅魍魉

　　今日十場泥草賽事，兩大騎師韋達同柏寶都手執唔少好馬，睇隔晚開飛賠率，有啲馬已備受熱捧，希望佢哋都可以發揮出馬匹應有水準。

　　精選場次第二場四班1000米直路賽，「錢照贏」上場初出跑田草1000米， 已被捧成大熱，奈何遇到強敵「小橋流水」，但「錢照贏」已拋離第三名「覓得寶」兩個幾馬位，證明水準好高，今次排外檔有利，可以補中，做膽。配腳方面，「好運精選」前次終於喺同程贏馬開齋，今場回師贏馬路程，拖腳首選。「精靈勇駿」上場初出跑1200米已幾乎放到，今次縮程一定啱跑。後備補上嘅「好笑容」上仗已經喺柏寶胯下跑近，今場有幸排十四檔，貼欄領放可跑入前列。

　　第八場一班1200米，望落去，「天久」、「盈彩繽紛」同「得到寶」三匹馬實力最突出。「天久」上場初跑泥地1200米，大勝對手三個馬位，又一匹泥地好手誕生，匆匆再戰當然係未收夠籌。「盈彩繽紛」至今五戰未嘗敗績，前次泥地1200亦大勝三個半馬位而回，泥草皆宜，愈戰愈勇，今場當然想力保不失。「得到寶」上場初跑同程即以輕鬆姿態贏馬，都係呢場嘅爭勝要角，同前面兩匹馬勢成鐵三角。第四選擇係「光輝出擊」，前次以快時間贏同程，回師贏馬路程，配腳要預佢一席。

　　第十場二班1600米，用「火龍駒」做膽，在港初出熱身一場後，上次增程跑1800米即大勝對手三個幾馬位，負重磅仍輕易放到，今次縮程跑 1600亦夠贏。配腳方面，先揀前仗1400米以快時間贏馬嘅「按得快」，其次係前仗同程僅以頸位之差跑第三嘅「漂亮第一」，今次強配柏寶，要拖。今場上二班再配蘇狄雄減磅嘅「鎗臣」，負磅輕上加輕，亦要兼顧。