馮諾嘉手記：按得醒檔利開勝門

魑魅魍魉

　　前日馬會公布新一輪馬主中籤名單，雖然金融海嘯剛過，大家還未來得及回氣，歐洲金融危機又捲土重來，市況不穩，經濟亦無明顯好轉，但仍未影響馬主們養馬嘅熱情，今年入紙抽馬嘅數目更有增無減，唔少身邊嘅馬主朋友都話今年很難中籤呢！幸而於馬主中籤名單中，唔少係小妹認識嘅朋友，一些係新任馬主，一些已經養馬多年了，如郭少明、范邦初等，而大家都一定認識的就有武打巨星洪金寶同四大天王之一嘅郭富城，現今世代消息一出傳千里，微博中恭賀郭富城嘅留言多的是！

　　今個星期跑禮拜六，天文台預測當日會有驟雨，可能會影響馬迷入場嘅雅興呢！第五場四班1400米，參戰馬實力一般，隨時造就「按得醒」開齋，匹馬初出已跑近，可惜近兩仗均抽劣檔，今場二檔有利可扭轉局勢。配腳拖前場跑近嘅「雙龍出海」、抽得一檔有利嘅「喜勝威」、前仗同程獲亞嘅「精英財星」。四連環多揀匹負輕磅嘅「心路」。

　　第七場三班1000米，呢場用「小橋流水」做膽，上場初出六倍即勝，證明幕後人信心十足，結果不負眾望，仲要大勝兩個幾馬位，認真超班，今場盃賽當前，好鬥志可作膽。配腳有連續兩場入位嘅「延續美麗」，質素一定唔曳，唯獨多仗入位未出頭，今場改配柏寶，配腳首選。「御鋒」初出已經跑第五，上場敗於難以穩定走勢，之後即進行閹割手術，小休後狀態不俗，配腳要拖。拖多匹上場入位，只係輸條頸嘅「超力駒」。四連環揀多匹強配韋達嘅「尚駿心」。