高清睇跑馬：勁快今次放到

魑魅魍魉

　　今季總場次574場四班田草1400米，「勁快」小休兩個月復出，不跑勝途1600米爭1400 米，四檔起步出閘唔快，但跑順後三兩個箭步已進佔第二位，僅慢過快馬「超力好」，由於不想與後駒鬥搶兩敗俱傷，稍為留後走二叠跟在第四位，入直路很快望空，然而過了三百五十米潘頓才推騎，均速馬鬥後勁自然不敵一眾後上馬，先其過終點的三駒，「信賴」再出受阻下跑第四，「中環英雄」接戰補中，「雄心馬主」翌戰繼續上名，而「勁快」在未有採取最煞食跑法下得第四已算及格，今次跑贏馬路程1600米，步速更合發揮，可期放到。

　　另於季內總場次590田草五班1400米，「創先機」十一檔起步，然而柏寶一樣跟前，早段走三、四叠冇遮檔，過了1000米，放頭馬加快步速將馬群拉開，「創先機」走入二叠跟住「鴻福星威」，轉直路彎移出三叠，入直路立即望空，起初柏寶打左手鞭時馬匹外閃，柏寶轉打右手鞭，馬兒內閃減輕衝刺強勁，最後二百米與「好小子」埋身肉搏，揮低對手之餘再壓倒「愛拼者贏」，「好小子」之後升上四班繼續入位，水準極高，周日「創先機」仍處五班爭贏馬路程，力足連捷。　

Sam