馬主論戰：風之子執多W

纯情小彩迷

　　剛戰蔡約翰贏夠四場，氣勢的確好強，但係告東尼今季啲馬表現亦唔曳，我睇佢有能力追返上嚟。今晚幾匹東廐馬之中，最鍾意第六場「風之子」，上仗響谷草1000米彈甩對手贏馬，擺明仲有大把分在手，今次吼準盃賽場合再跑同程，有機會再贏。

　　另一匹心水係頭場「贏啲啲」，上個禮拜三響泥地1200米贏得好輕鬆，五歲馬正式踏入升軌，今次隔一個星期又再跑，擺明有心打鐵趁熱，谷草一哩亦都係射程範圍，值得吼實。

梁廷鏘

風之子精彩生輝夠準

　　今晚推介尾場「精彩生輝」，呢隻馬今季跑過七仗，先後遇過「齊歡唱」、「喜勁飛」同「好德煌」等惡馬，結果取得一冠三亞兩季一殿，演出真係準得交關，今次雖然排響不利嘅十一檔起步，但我有信心呢匹忠心馬仍會跑得好，一於捧場。

　　另外鍾意第五場「滙名燈」，上場增程跑1400米其實難度好高，結果末段仍衝入一席第三，演出相當搶眼，今次轉嚟跑季內贏過嘅谷草1200米，仲要抽埋個黃金一檔起步，坐亞望冠。

任達華

電訊巨星開齋

　　最近喜事重重，先係我細佬Sunny嘅BB已經出世，響度要先恭喜佢﹗另外，我位好朋友郭飛，最近亦陪佢太太曉曉由北京嚟咗香港做產前檢查，真係戥佢哋開心。

　　今晚我哋隻「電訊巨星」有份上陣，呢隻馬最近跑谷草1200米都好接近，今晚我將會同郭飛兩夫婦一齊入場打氣，希望佢哋可以幫隻馬帶嚟好運，克服十一檔劣勢。另外，我仲預祝苗禮德可起孖兼捧盃，皆因跑第六場五陵會盃嘅「同心威駿」實力都好強，有望同「電訊巨星」齊齊贏馬。

張敬山