局內人：贏啲啲打鐵趁熱

纯情小彩迷

　　何良馬房明晚有多匹惡馬參戰，馬房中人透露，列陣第二場四班1650米的「包裝好友」甚具留意價值。上仗後此駒狀態起得更靚，今番韋達一早向何良索騎，轉爭谷草對手較弱，有極大勝機。

　　至於出爭第三場四班一哩的「超力好」亦要留意，八歲馬近期狀態回勇，近兩仗在同程取得連捷，今次再爭一哩排二檔起步，預期可順利搶欄快放，只要同場冇馬鬥燒，隨時再放到。而列陣第四場四班1200米的「好玩」，馬房中人指此駒前日照鼻後拖返馬房，仍在馬格內紮紮跳，火氣旺盛，今次續爭累積兩勝五位的強項路程，有力帶返，是坐二望一之材。

　　另外，梁定華馬房亦有搏殺消息傳出，指列陣頭場五班一哩的「贏啲啲」（可以添食。此駒上周三在泥地賽事贏馬，表現輕鬆，證明泥地性能出色，但其實牠以往在草地賽亦有不俗表現，谷中一哩亦是其所長。現時「贏啲啲」已踏入大熟階段，今番匆匆再來，幕後明顯有心打鐵趁熱，難得有佳態支持，必把握機會爭取成績。

梁杰